Kommunestyret tek opp innsparingar og tenestetilbod

Heile 26 politiske saker står på dagsorden i tillegg til meldingssaker og spørsmål og interpellasjonar. Blant disse er det fire større økonomisaker med budsjettrevisjon 1. halvår 2024, tilbod til personar med demens og deira pårørande (mandat 10), habiliteringstenesta i framtida (mandat 26) og sjukeheimstilbod og heimetenester i Bømlo kommune (mandat 42).

Sjå møteinnkalling og saksliste kommunestyremøte 17.06.2024

Budsjettprosessen i Bømlo kommune

Struktur- og driftsendringar

Kommunen sin økonomi er i ubalanse. Kommunen driv pr no tenestene med for høge kostnader,  og har brukt opp sine disposisjonsfond (sparepengar) til drift. Kommunen hadde eit meirforbruk i 2023 på 12,188 mill. kr som må dekkast inn i løpet av 2024 og 2025. Kommunen har hatt ei negativ utvikling i netto driftsresultat, som har gått frå 1,7% i 2020 til minus 3,9% i 2023. 

Føreslegne tiltak til innsparingar i budsjettrevisjonen vil redusere prognosen for årsresultatet 2024 frå 27,7 mill kr til 19,6 mill. kr i minus. Vidare vert det peikt på ytterlegare moglege tiltak som vil komme i samband med budsjett og økonomiplan for 2025-2028. Vert tiltaka vedtekne av kommunestyret vil underskotet som må dekkast inn innan 2025 vere på 31,8 mill. kr.  Om samla meirforbruk overstig 36-37 millionar kroner ved årsslutt 2024 vert kommunen meld inn i ROBEK (under statleg kontroll) allereie i 2025. 

Bømlo kommune har generelt sett stramme økonomiske rammer som gjer det nødvendig med omprioriteringar og omstillingar. Kommunen må tilpassa seg ein situasjon med færre tilgjengelege arbeidskraft og større behov for tenester blant dei eldre​ framover. Dette vil bety endringar i strukturen og nivået på tildelte tenester. 

Sjå direktesendt kommune-tv