Ordførar Morten Helland ber fylkeskommunen om politisk drahjelp med viktige omstillingar og infrastruktur for næringslivet.
Simon Knutsson Sortland
Utvalet hadde si todagars samling i Sunnhordland med bedriftsbesøk og orienteringar på Stord og Bømlo før dei sette det politiske møtet på Bømlo hotell onsdag. Her var det orienteringar frå dagleg leiar Astrid Kjellevold i Atheno, Sigbjørn Framnes for Region Sunnhordland og presentasjon og utfordringsbilete for Bømlo kommune ved kommunedirektør Kjetil Aga Gjøsæter og ordførar Morten Helland. Magne Heimvik orienterte om kraftsituasjonen i Sunnhordland før lunsj og møtet i hovudutval for næring.
Møte i Hovudutval for næring 27.-28.8.2024
Framoverlent næringsliv
Ordførar Morten Helland avrunda presentasjonen frå Bømlo kommune med oppmoding om politisk drahjelp til grøn omstilling for ein region med høg sysselsetjingsgrad i det han kalla “utfasande” næringar. Likeså når det gjeld infrastruktur som veg, kraft- og nettkapasitet. Ikkje minst å sikra sjømatindustrien betre rammevilkår. Stord-ordførar Sigbjørn Framnes (FrP) representerte her Region Sunnhordland.
Han framsnakka regionen sine åtte sunnhordlandskommunar og arbeidet til Sunnhordlandsrådet, Geopark Sunnhordland, Visit Sunnhordland og Bu i Sunnhordland. Strategisk samarbeid mot Rogaland og Bergen, viktige oppgåver for berekraft som Rein Hardangerfjord, og ikkje minst samferdsle og Hordfast.
Oddmund Klakegg (Sp) leiar Hovudutval for næring i Vestland fylkeskommune som har 15 medlemer, mellom anna Bente Spissøy frå Bømlo INP. Han sa seg imponert over det framoverlente næringslivet her. Målet til hovudutvaler er å møta næringslivet frå nord til sør i fylket, både nyskapande næringsklynger som i Sunnhordland og andre der fylkeskommunen må skubba litt meir på.
- Me opplever at næringslivet her er uroa over tilgangen på kraft, så det vil få høg prioritet hos oss. Situasjonen er mest prekær her i Sunnhordland, og løysinga ligg i å utbetra det regionale kraftnettet, meiner Klakegg.
Kommunedirektør Kjetil Aga Gjøsæter og ordførar Morten Helland presenterte om tilrettelegging for næring og infrastruktur for fylkespolitikarane.
Simon Knutsson Sortland