Laga privat reguleringsplan

Privatpersonar, tiltakshavarar, organisasjonar og andre mynde har rett til å fremja framlegg til privat detaljregulering, jf. plan- og bygningslova § 12-3. Det vil seia at praktisk talt alle kan fremja framlegg til privat reguleringsplan. 

Det å utforma ein reguleringsplan krev inngåande kjennskap i eit komplekst system. Det er derfor krav til fagkunne for å få lov til å utarbeida ein reguleringsplan, jf. plan- og bygningslova § 12-3.

Du må sjølve kontakta ein konsulent med naudsynt kompetanse til å laga reguleringsplanen for deg.

Det er kommunen som skal vurdera om krav til fagkunne er oppfylt. Kravet vil bli sett i samanheng med storleik og kompleksitet i planen. Fagkunnig konsulent må ha tilstrekkeleg kjennskap til plansystemet, og må kunna utarbeida ein teknisk riktig reguleringsplan med plankart, føresegner og planomtale. 

• Først og fremst må du sjekka om området det gjeld er regulert frå før. Er det allereie regulert skal denne planen følgjast. Viss det ikkje er aktuelt må du endra reguleringsplanen.
   
• Du må laga reguleringsplan viss du vil gjennomføra større byggje- og anleggsarbeid og andre tiltak som kan få vesentlege verknadar for miljø og samfunn, jf. plan- og bygningslova § 12-1.
   
• Du må laga reguleringsplan når kommuneplanen sin arealdel eller kommunedelplan fastsett at det skal lagast reguleringsplan.

• Du må laga reguleringsplan viss ein eventuell områderegulering fastsett krav om detaljregulering for ditt område. 
   
• Du må elles laga reguleringsplan når kommunen finn at saka sin natur krev reguleringsplan. Det kan vera når det er naudsynt for å sikra forsvarleg gjennomføring av byggje- og anleggstiltak, og/eller når det er fleire berørte partar, og det trengs avklaring i plan for å ivareta de ulike interessene i området.

Lengda på prosessen varierer mykje, avhengig av kor komplisert tiltaket er, kor avklarte tilhøva rundt tiltaket er og om det oppstår konfliktar som må oppklarast undervegs.

Det er derfor vanskeleg å slå fast kor lang tid det vil taka å for å få din konkrete plan godkjend. Det er likevel nokon faste punkter og nokon lovpålagte saksbehandlingsfristar, og saman gir det eit godt bilete av prosessen.

Vanlegvis vil me sei at ein kurant reguleringsplanprosess tek rundt eitt år. Ein problematisk reguleringsplanprosess kan likevel taka fleire år.

Bømlo kommune har eit eige gebyrregulativ som blir årleg fastsett av kommunestyret.

Gjeldande gebyrregulativ er frå 01.01.2024.

Totalt er gebyr per 01.01.2024, utan eventuelle tilleggsgebyr:

• 101 559,- for reguleringsplanar mindre enn 10 dekar.  
• 167 221,-  for reguleringsplanar større enn 10 dekar. 
• 36 771,- for mindre endring av reguleringsplanar med oppstartsmøte  (28 016,- utan oppstartsmøte).

Viss du ønsker å gjennomføra eit tiltak i strid med gjeldande reguleringsplan som ikkje let seg løysa gjennom dispensasjon, må du endra reguleringsplanen.

Det er to måter å gjera dette på. Kva framgangsmåte som er høveleg blir vurdert etter skjønn, men det er visse føringar, jf. plan- og bygningslova § 12-14.  

Endring av reguleringsplan

Hovudregelen er at utfylling, endring og oppheving av reguleringsplan skal gå gjennom same prosess som ein ny reguleringsplan. Dette er fordi dei rammene det blei samde om i planprosessen skal gjelda, og endringar må gjennom ny høyring og offentleg ettersyn sånn at den tidlegare prosessen ikkje blir tilsidesett. 

Mindre endring av reguleringsplan

Når endringa i liten grad vil påverka gjennomføringa av planen, ikkje går utover hovudrammene i planen, og heller ikkje røyrer ved omsynet til viktige natur- og friluftsområde, kan reguleringsplanen endrast med enklare behandling.

Då blir saka lagt fram for relevante offentlege mynde, grunneigarar, naboar og tverrbuar som får høve til å uttala seg, vanlegvis med fire vekers frist. Blir endringa godteke av partane utan vesentlege innvendingar kan saka behandlast politisk. Vedtaket blir til slutt lagt fram for dei som vedtaket røyrer ved med tre vekers klagefrist før endringa blir rettskraftig.

Startpakka

Etter 10 år skal kommunen vurdera om planen framleis kan nyttast som grunnlag for byggje- og anleggstiltak.

Planen er framleis gyldig i utgangspunktet, men regelverk, lover, forskrifter og statleg, regional og kommunal politikk er alltid under utvikling. Me må derfor vurdera om planar som er eldre enn 10 år framleis er i tråd med dette. Er det vesentlege fråvik kan det bli naudsynt å gjera endringar i planen.