Ver førebudd – hald deg orientert

Stenging av Bømlabrua eller stans i ferjesambandet Langevåg-Buavåg er noko me må pårekna frå tid til anna. Publikum forventar god informasjon uavhengig av kven som har ansvaret, og Bømlo kommune jobbar med å bli betre på dette feltet. Under finn du nyttige lenkjer det kan vere lurt å ha lett tilgjengeleg.

- Publikum ser ofte til kommunen for informasjon sjølv om den fell utanfor kommunen sitt ansvarsområde, som til dømes Bømlabrua og ferjesambandet Langevåg-Buavåg. Det er forståeleg. Vårt mål er å hjelpa til med å gjere naudsynt informasjon lettare tilgjengeleg for publikum. Dette gjeld bruk av våre eigne kanalar på heimesidene og i sosiale media samt å lenkje til aktuelle ansvarlege aktørar, sm til dømes Statens vegvesen, politiet og Vestland fylkeskommune, seier kommunedirektør Kjetil Aga Gjøsæter.

Kommunen følgjer sine beredskapsplanar og legg ut informasjon fortløpande om mellom anna oppretting av lokal legevakt og å sikra ein ambulanse til øya via sambandet Langevåg-Buavåg snarast råd. Helseberedskapen er viktig å få på plass relativt raskt og om naudsynt setje ferja i beredskap i tråd med gjeldande planverk.

Hendingar som stengjer ei eller begge bruene i Trekantsambandet grunna sterk vind eller ulukker førekjem. Stenging av Bømlafjordtunnellen er heller ikkje ukjend. Både kommunar, fylke, vegvesen og redningsetatar har hatt fleire møter om risikoen for stengte inn- og utfartsårer mot kommunen. Kommunedirektøren har denne saka høgt oppe på agendaen.

Nyttig informasjon og naudnummer

Du kan førebu deg ved å halda deg orientert og vite kvar du finn informasjon. Det er fleire appar og sms-tenester du kan abonnere på for å få direktevarslingar. For informasjon på X / Twitter må du ha konto og vera innlogga.