Du bur i ein Av-og-til-kommune

Me ønskjer at vaksne i kommunen skal ha alkovett rundt barn. Barn og unge fortener gode oppvekstvilkår med trygge, nærverande vaksne. Ein trygg barndom inneber at dei vaksne har alkovett. Det vil seie at dei vaksne, spesielt foreldre og besteforeldre, drikk null, eitt eller maks to glas alkohol når dei er saman med barn og unge, og at dei er klar over dei negative konsekvensane alkoholbruken deira kan ha for barn og unge.

Les meir på avogtil.no/barn 

Me ønskjer at ungdommane våre skal ha ei trygg og god ungdomstid, og at foreldra deira skal vera både kjipe og kjærlege. Foreldra er nemleg dei aller viktigaste førebyggjarane. Me jobbar for å utsetja alkoholdebuten til ungdom, for at foreldre skal setja tydelege grenser for ungdom når det gjeld bruk av alkohol og andre rusmiddel, og for at russetida skal gjennomførast i kontrollerte former utan vald, overgrep, ulykker og andre problem knytte til rusbruk.

Les meir på avogtil.no/ungdom

Me ønskjer at barneidretten skal vera ein trygg stad. Barn og unge har rett på eit trygt idrettsmiljø og eit støtteapparat som fangar dei opp dersom dei treng det. Det inneber at alle idrettsarrangement for barn er alkoholfrie, at idrettsklubbar i Noreg har retningslinjer for alkoholbruk som dei nyttar aktivt, og at støtteapparatet i idretten veit kva dei skal gjere dersom dei er uroa for eit barn.

Les meir på avogtil.no/idrett

Mange nordmenn brukar store delar av ferien og fritida i båt. Me ønskjer å bevisstgjera båtførarar om godt alkovett, for det skal vera trygt for både barn og vaksne å ferdast på sjøen og nyte båtlivet. Alkohol er ein medverkande faktor til mange båtulykker og drukningsulykker. Me jobbar for at det skal bli færre alkoholrelaterte ulykker på sjøen, og for at innbyggjarane skal få kunnskap om kva konsekvensar alkoholbruk kan ha for tryggleiken ved og på sjøen.

Les meir på avogtil.no/båt

Godt alkovett medverkar til god fysisk og psykisk helse. Me ønskjer at innbyggjarane skal ha eit trygt drikkemønster, og at dei skal vite om dei negative konsekvensane alkoholbruk kan ha på den fysiske og psykiske helsa vår både på kort og lang sikt. Generelt sett bør folk drikke både mindre og sjeldnare. Alkovett bør vera ein personleg strategi for alkoholbruk blant befolkninga – det vil bidra til betre helse.

Les meir på avogtil.no/helse

Me ønskjer ein sunn alkoholkultur på arbeidsplassen. Dei negative konsekvensane for arbeidslivet viser seg som regel i form av ineffektivitet, auka fråvær og tryggleiksrisiko. I tillegg har problematisk alkoholbruk negativ påverknad på både omdømmet, relasjonane og arbeidsmiljøet. Den største utfordringa er at me ofte ikkje snakkar om kvar grensene går for kva som er greitt, og kva som ikkje er greitt, og korleis me skal handtere ugreie situasjonar.

Les meir på avogtil.no/arbeidsliv

Me ønskjer å førebyggja ulykker i trafikken. Grensene me set for oss sjølve og andre, er svært tydelege. Likevel vert det gjennomført mange turar i ruspåverka tilstand kvar dag. For å redusera risikoen for skadar og ulykker er det naudsynt at nokre situasjonar er alkoholfrie. Trafikken er ein slik situasjon. Me har ingen å mista.

Les meir på avogtil.no/trafikk

Me ønskjer alkovett for den vesle. Når mor drikk, får barnet i magen den same promillen. Kroppen til barnet kan ikkje bryte ned alkoholen slik ein vaksen kropp kan. Alle organ hos fosteret kan bli påverka, sjølv av små mengder alkohol. Det finst inga sikker nedre grense, og norske helsemyndigheiter tilrår at gravide er heilt avhaldande under svangerskapet.

Les meir på avogtil.no/alkohol-og-graviditet